A ASOCIACIÓN LETRA ESCRITA xorde no MARCO de Vigo co compromiso de animar e promover actividades de escritura entre persoas con afección, interese e inquietude por escribir, teñan obra publicada ou non, poñendo en valor a cultura de Galicia e, en particular, o uso do idioma galego.
A idea de constituír a ASOCIACIÓN LETRA ESCRITA xorde a iniciativa dun grupo de afeccionados á escritura que se coñecen con motivo de participar no TALLER LITERARIO organizado por IMAXINATEA en Vigo que imparte FRANCISCO CASTRO escritor, editor e músico do popular barrio de Teis.
Descobren que este tipo de talleres axudan a desenvolver a creatividade, o pensamento crítico, habilidades de comunicación e a aprendizaxe de coñecementos a través das relacións persoais, entre outros. Todo iso conforma un poderoso aliciente no escritor amateur para superar as limitacións e xerar un efecto motivador cara á ESCRITURA. O problema deste tipo de actividades é que están delimitadas no tempo. Iso implica que, unha vez concluída, o aliciente e o efecto motivador probablemente acabarase diluíndo ou minguando significativamente. Tendo a escritura como paixón común, consideran que unha agrupación de escritores, teñan obra publicada ou non, co obxectivo de axudarse mutuamente a superar estas limitacións e fomentar a ESCRITURA, favorecería a motivación para seguir desenvolvendo habilidades e, en consecuencia, promover e aumentar a creación literaria.
Cun obxectivo claro e co compromiso de poñer en marcha o proxecto, xurdiron as reunións de traballo en diferentes puntos de Vigo. Finalmente, o 26 de xuño de 2025, reunidos os socios fundadores no MARCO de Vigo (Museo de Arte Contemporánea — https://www.marcovigo.com) aproban os Estatutos e a realización de xestións para crear a asociación.
Fachada Museo MARCO – (Javier Corbacho – 2025)
