Saúda
Moi apreciado escritor.
Correspóndeme o privilexio deste primeiro saúdo desde Letra Escrita.
A nosa asociación acaba de abrir os ollos desde Galicia ao mundo e, como ao neno que levamos dentro, todo lle sorprende. Os que iniciamos o camiño hai uns meses, inspirados e motivados por Javier -pai da criatura- movémonos coa curiosidade dun crío, ao que acudimos en busca da súa mirada limpa e fresca para ver o mundo e espertar a nosa curiosidade #ante uns tempos difíciles (cales non o foron?), pero agora cun intruso entre nós: a IA, un lume que pode ser fogueira, ou incendio devastador. Ela non está convidada a esta mesa. Os que si estamos, e os moitos que viredes, só somos humanos e imperfectos, todos padecemos a síndrome do impostor, e todos nos preguntamos por que escribir?
Se a túa resposta é, porque non podo evitalo, porque necesito mostrar ese trasgo que rolda pola miña cabeza, se todo conto bole nela coa pregunta que pasaría se…? Se escribes coa alma e xogas coas palabras en poemas inacabados, en relatos e novelas agridoces, en teatro e crónicas, entón, Letra Escrita é o teu fogar.
Aínda que sexa acabada de nacer, a nosa asociación ten unha fame voraz e a ambición de ser libre. Leremos entrelíneas, sen orelleiras, nin vendas nos ollos. Tenderemos pontes coas nosas artes irmás (cinema e música). Na nosa rede (mal chamada web) atoparás, cursos e concursos, retos e actividades, tamén parte da nosa obra, e a túa terá o seu espazo, escoitaremos a túa voz, e xuntos buscaremos a beleza, alí onde se atope, en galego e en castelán, pero sempre paladíns da nosa cultura. Escribiremos para suscitar máis preguntas, e estaremos ávidos por emocionar.
Quen dixo que todo estaba escrito, ou inventado? En Letra Escrita cremos que non, que tes moito que contar, por iso Grazas! e… Benvenido!
Roberto Penas Mariño
Presidente da Asociación Letra Escrita.
Comprometida coa creación literaria en Galicia e en galego
A nosa asociación nace comprometida coa creación de obra literaria. Un espazo de encontro no que reunirnos, motivarnos e axudarnos co obxectivo principal de promover a actividade de escribir en Galicia e en galego.
Somos unha asociación de carácter cultural e sen ánimo de lucro creada ao amparo do disposto na Lei Orgánica 1/2002 reguladora do dereito de asociación e demais lexislación aplicable. No funcionamento interno réxese polos seus estatutos e os acordos validamente adoptados en asemblea xeral.
Obxectivos da asociación
Animar e promover actividades de escritura, en particular entre persoas afeccionadas a escribir ou que teñan inquietude por escribir,
Desenvolver a creatividade, o pensamento crítico, as habilidades de comunicación, o aprendizaxe de coñecementos e as relacións interpersoais aplicadas á creación de obra literaria.
Poñer en valor da creación literaria como elemento dinamizador do nivel educativo e cultural así como da conciencia crítica e a capacidade analítica da sociedade.
Animar e promover a creación de obra literaria e contidos análogos en calquera medio.
Animar e promover a cultura de Galicia, en particular o uso do idioma galego.
Apoiar e promover a edición e publicación das obras literarias e artísticas creadas polos asociados.
Divulgar o coñecemento das obras escritas e publicadas en calquera medio polos escritores membros desta asociación, así como prestixialos ante a opinión pública e as institucións e organismos públicos e privados relacionados coa literatura.
Divulgar, por tódolos medios ao noso alcance, os valores propios da literatura e da lectura. Fortalecer e promover a lectura en lingua galega, así como a presenza e o coñecemento do libro galego por parte da cidadanía.
Colaborar, establecer acordos, alianzas ou acciones conxuntas con calquera institución, pública o privada, en pro da consecución dos fins desta asociación.
Para ser socio
LETRA ESCRITA é un espazo compartido de autores ao que se pode unir calquera persoa física que mostre afección, interese ou inquietude por escribir, teña obra publicada ou non, en todo caso comprometida coa creación de obra literaria en Galicia xa sexa promovendo o uso do idioma galego ou poñendo en valor o patrimonio social, cultural e natural de Galicia con independencia do idioma que utilicen.
Tamén calquera persoa, física ou xurídica, que queiran colaborar achegando recursos (económicos, financeiros e de know how) para o desenvolvemento e consecución dos fins da asociación.